د هلمند په بهرامچه ولسوالي کې امنیتي ځواکونو د کشفي عملیاتو په ترڅ کې د مسو د زرګونو خښتو د قاچاق هڅه شنډه کړې ده.
د راپورونو له مخې، دغه عملیات د بهرامچې ولسوالي د رباط په سیمه کې د ۲۱۵ عزم قول اردو اړوند د اووم نمبر محمدي لېوا د اووم کنډک ځواکونو له لوري شوی چې په پایله کې یې د مسو ۴۳۸۲ خښتې نیول شوې دي.
د هلمند د اطلاعاتو او فرهنګ ریاست وایي، یادې میسي خښتې هغه مهال ونیول شوې چې قاچاق وړونکو غوښتل دا مواد په ناقانونه ډول ګاونډي هېواد ته ولېږدوي.
د یاد ریاست مرستیال، مولوي شېرمحمد وحدت، ویلي چې د ځواکونو په دغو کشفي او بریالیو عملیاتو کې نه یوازې د مسو د قاچاق مخه نیول شوې، بلکې یوشمېر طبي وسایل هم نیول شوي چې غوښتل یې، په ناقانونه ډول هېواد ته وارد شي. د هغه په وینا، یاد توکي له ضبط وروسته لهمنځه وړل شوي دي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
بلخوا، د سیمې یوشمېر اوسېدونکو د دې اقدام هرکلی کړی او ویلي یې دي چې د قاچاق مخنیوی د هېواد د اقتصادي ثبات او د طبیعي زیرمو د ساتنې لپاره مهم ګام دی.
د رباط سیمې یوه اوسېدونکي چې نه یې غوښتل نوم یې واخیستل شي، سلاموطندار ته وویل: «که دا ډول اقدامات دوام ومومي، ملي شتمني به خوندي پاتې شي او د ناقانونه فعالیتونو مخه به ونیول شي.»
مسوولین ټینګار کوي چې امنیتي او دفاعي ځواکونه به هېچا ته اجازه ورنه کړي چې په ناقانونه ډول واردات او صادرات ترسره کړي، او د دې ډول فعالیتونو پر وړاندې به جدي او دوامدار اقدامات وکړي.
د یادونې وړ ده چې تر دې وړاندې هم د همدې کنډک ځواکونو په بېلابېلو سیمو کې د خوراکي او غیر خوراکي توکو د قاچاق ګڼې هڅې شنډې کړې دي. چارواکي وایي، د قاچاق پر وړاندې مبارزه به لا نوره هم پراخه شي او سرغړوونکي به قانون ته وسپارل شي.