د ایران چارواکو اعلان کړی چې د هرمز تنګي له لارې د کښتیو پر تېرېدو به دودیز فیسونه نه لګول کېږي، خو د دې لارې د امنیت په نوم د نوو لګښتونو طرحه چمتو کېږي.
د ایران د پارلمان د ملي امنیت کمېټې ویاند ابراهیم رضايي ویلي چې ټولې کښتۍ به یوازې د ایراني چارواکو له مخکنۍ همغږۍ وروسته له تنګي تېرېږي. د هغه په وینا، دا اقدام د سیمې د امنیت د ټینګښت لپاره اړین بلل شوی دی.
نوموړي ټینګار کړی چې د دښمنو هېوادونو پوځي کښتۍ، په ځانګړي ډول د امریکا او اسراییلو اړوند، ته به د تېرېدو اجازه ورنه کړل شي. هغه زیاته کړه چې «ملګرې کښتۍ» کولای شي د مخکېني تفاهم پربنسټ تګراتګ وکړي.
رضایي همداراز ویلي چې ایران د تنګي د مدیریت او امنیت په برخه کې د امریکا هر ډول رول ردوي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
بلخوا، د ایران یو بل چارواکي محمود نباویان څرګنده کړې چې ځینې سوداګریزې کښتۍ به د ټاکل شویو فیسونو په بدل کې د تېرېدو اجازه ولري. هغه دا موضوع په لبنان کې د وروستي اوربند له وضعیت سره تړلې بللې ده.
په همدې حال کې، د امریکا ولسمشر ډونالډ ټرمپ دا اړیکه رد کړې او ویلي یې دي چې د لبنان اوربند او د هرمز تنګي وضعیت یو له بل سره تړاو نهلري.
کارپوهان خبرداری ورکوي چې د هرمز تنګي په اړه دغه وروستي پرمختګونه کولای شي پر نړیوالو سوداګریزو لارو او د انرژۍ پر بازارونو پراخ اغېز ولري، ځکه دا تنګی د نړۍ د نفتو د لېږد یو له مهمو مسیرونو څخه شمېرل کېږي.