د کابل ښار د کارتهاریانا سیمې یوشمېر اوسېدونکي وايي، څه باندې ۸ میاشتې کېږي چې د دولتي اوبو نلونه یې وچ شوي او خلک د څښاک پاکو اوبو ته لاسرسی نهلري.
نادر چې د یادې سیمې اوسېدونکی دی وايي، هره ورځ یوه کیلومټره پلې لار وهي، څو د غره لمن کې له یوه جومات څخه کور ته د څښاک اوبه برابرې کړي.
په ورته مهال د کارتهاریانا سیمې یو بل اوسېدونکی شیریندل هم د اوبو کمښت څخه شکایت لري او وايي چې خلک د بېوزلۍ او وزګارتیا له امله له ګڼو ستونزو سره مخ دي او په پیسو د اوبو د اخیستلو توان نهلري.
د کابل ښار د کارتهاریانا سیمې د ګذر وکیل ګلخان وايي، څه باندې ۸ میاشتې کېږي چې د دغې سیمې په اوسېدونکو اوبه بندې شوي چې ورسره خلک له ګڼو ستونزو سره مخ دي.
ګلخان زیاتوي چې له تېرو اتو میاشتو راهیسې څه باندې ۲۵۰۰ کورنۍ د اوبو کمښت سره مخ دي او په وینا یې، په وار وار یې د یادې ستونزې حل په موخه اړوند ادارو ته ورغلي، خو تراوسه یې د ستونزې حل لپاره اقدام نه دی کړی.
د کابل د ښاري اوبو رسولو او فاضلابو دولتي شرکت مسوولان وايي، تېر کال کارتهاریانا سیمه کې یوه شپه او ورځ کې د اوبو د استخراج کچه ۷۲زره متر مکعب ته رسېده او اوس ۲۲ زره متر مکعب ته را ټيټه شوې چې دا د کارتهاریانا سیمې اوسېدونکو ته د اوبو بندېدو لامل شوی دی.
د کابل د ښاري اوبو رسولو او فاضلابو دولتي شرکت مرستیال محمد نسیم صمیم وویل: «له دې وړاندې د کارتهاریانا سیمې د اوسېدونکو لپاره د اوبرسولو په موخه دوه ژورې څاهګانې کیندل شوې وې، خو اوس وچې شوي او موږ هڅه کوو چې ډېر ژر د یادې سیمې د اوسېدونکو د اوبو کمښت ستونزې ته رسېدنه وګړو.»
له دې سره د کابل د اوبو رسونې ادارې مسوولان له کابل ښاریانو غواړي چې د ځمکې لاندې اوبو کچې لوړولو لپاره د باران او واورې اوبه جذبوونکو سیمو کې زېرمه کړي.
سلاموطندار پر ټویټر هم وڅارئ
د یادونې وړ ده چې دې وروستیو کلونو کې د اوبو کمښت موضوع د کابل اوسېدونکو لپاره په جدي ستونزې بدله شوې او د ښار ځینو برخو کې خلک د څښاک اوبو ته د نه لاسرسي په دلیل اړ دي چې له ساعتونو انتظار وروسته د اوبو ټانکرونو څخه اوبه په بیه واخلي.