د پروان والي فضلالدین عیار وايي، د ياد ولايت د پوهنې رييس عبدالظهور حکیم د اداري فساد او له دندې د ناوړه ګټې اخيستو په تور د پروان ولايت د استيناف څارنوالۍ ته معرفي شوی دی.
فضلالدین عیار سلاموطندار ته وايي، قراردادونه، د دفتر داخلي موضوعات او د ښوونکيو ننګونې هغه تورونه دي چې د پروان د پوهنې رييس يې څارنوالۍ ته معرفي کړی دی.
خو د ياد ولايت پوهنې رياست کې يوه بله سرچينه وايي، د پوهنې رييس د عبدالظهور حکیم ترڅنګ د مالي، د تدارکاتو او بشري سرچينو مديران هم څارنوالۍ ته معرفي شوي دي.
په ورته وخت کې د پروان ولايت د استيناف څارنوالۍ له اداري فساد سره د مبارزې رسمي مکتوب چې سلاموطندار ته رسېدلي ښيي چې دغې ادارې د ياد ولايت د پوهنې رييس، مالي مدير، د تدارکاتو مدير او د بشري سرچينو مديران احضار کړي دي.
خو د پروان د پوهنې رييس عبدالظهور حکیم وايي، څارنوالۍ ته ځکه معرفي شوی چې د قرنطين ورځو کې يې د اضافه کارۍ امتياز اخيستی دی.
ومو غوښتل په دې اړه د پروان د استيناف څارنوالۍ نظر هم ولرو؛ خو بريالي نه شوو.
