پاکستاني رسنیو نن یکشنبه د کب اوومه راپور ورکړی چې د دغه هېواد د خېبرپښتونخوا ایالت په کوز دیر جندول مایار سیمه کې یوه ځوان د ټیکټاک پر سر خپل پلار وژلی او مور یې ټپي کړې ده.
سیمه کې پولیسو ویلي چې دغه ځوان حسنین نومېږي او ۱۸ کاله عمر لري چې خپل پلار یې په ډزو ویشتلی او وژلی یې دی. د پولیسو په وینا، یاد کس خپله مور هم په ډزو ویشتلی چې اوس روغتون کې ده.
د رسنیو د راپورونو له مخې، پولیس د خپل پلار قاتل نیولی او ویلي یې دي چې دغه پېښه د ټيکټاک پر سر د شخړې له کبله رامنځته شوې ده.
یوه پولیس چارواکي رسنیو ته ویلي: «د یاد ځوان پلار خپل زوی د ټیکټاک له کارولو منع کړی و او موبایل یې ترې اخستی و، خو دغه ځوان له خپل پلار د موبایل غوښتنه کړې وه، پلار یې نهو ورکړی او هغه هم خپل پلار او مور په ډزو ویشتي دي.»
سلاموطندار پر ټویټر هم وڅارئ
دغه پېښې داسې مهال کېږي چې له دې وړاندې هم پاکستان کې د پابجي ګېم یوه کاروونکي د خپلې کورنۍ څو غړي وژلي وو.