د پاکستان پوځ وايي چې د خېبرپښتونخوا په لکي مروت سيمه کې له وسلهوالو سره په نښته کې یې درې سرتیري وژل شوي دي.
پاکستاني رسنیو نن جمعه د اپرېل ۲۸مه د یوې پوځي سرچینې له قوله راپور ورکړی چې بېګاه شپه له وسلهوالو سره په نښته کې درې سرتیري وژل شوي دي.
د سلاموطندار پښتو فېسبوکپاڼه وڅارئ
د پاکستان پوځ په دې نښته کې د اوو وسلهوالو د وژلکېدو ادعا هم کړې ده. دغه سرتیري هغه مهال ووژل شول چې وسلهوالو بېګاه ناوخته په لکي مروت کې د سرحدي ځواک او پوځ ګډ کمپ باندې برید وکړ.
د سیمې اوسېدونکو رسنیو ته ویلي چې په دغه نښته کې له سپکو او درنو وسلو څخه هم کار اخیستل شوی دی. د «تحریک جهاد» په نوم یوې لږې پېژندل شوې وسلهوالې ډلې پر ټولنيزو رسنيو په لکي مروت کې د برید مسوولیت پر غاړه اخیستی دی.
په ورته مهال پرون پنجشنبه هم یاده سیمه کې له وسلهوالو سره په نښته کې دوه پاکستاني پوځیان وژل شوي وو. د هغه برید مسوولیت کومې ډلې پر غاړه نهو اخیستی.
دا په داسې مهال دی چې په دې وروستیو کې د پاکستان په ډېری سیمو کې وسلهوال بریدونه زیات شوي او د دغه هېواد خلک یې اندېښمن کړي دي.