د اطلاعاتو او فرهنګ وزارت د ځوانانو چارو معین وايي چې هېواد کې دامهال د ۴.۵ میلیونه لوستو ځوانانو له ډلې څخه ۳.۵ میلیونه یې دندې نهلري او وزګاره دي.
د ځوانانو چارو معین محمدیونس راشد دغه څرګندونې نن سهشنبه د سلواغې ۲۵مه هلمند ته د خپل سفر پر مهال یوې غونډې ته کړې دي.
نوموړي همداراز زیاته کړه چې د یادو لوستو ځوانانو له ډلې څخه ۸۰۰زره یې په دولتي ادارو کې پر دندو بوخت دي او ځینې نور یې بیا خصوصي سکټور کې کار کوي.
د ځوانانو چارو د معین په وینا، نږدې ۱۰۰زره لوستي ځوانان د هېواد په خصوصي سکټور کې پر دندو بوخت دي او یوشمېر نور ځوانان د حکومت لهخوا بهرنیو هېوادونو ته د کار لپاره لېږدول شوي دي.
که څه هم هر کال د هېواد له بېلابېلو پوهنتونونو څخه ګڼشمېر ځوانان فارغېږي، خو محمدیونس راشد وايي چې د اسلامي امارت حکومت هر کال یوازې د ۱۰۰۰۰ کسانو د ګومارنې ظرفیت لري چې پاتې نور کسان بې دندو پاتې کېږي.
واک ته د اسلامي امارت له رسېدو مخکې وړاندې هم هېواد کې د وزګارتیا له امله پر حکومت نیوکې کېدې، خو د اسلامي امارت په راتلو سره چې ګڼشمېر نړیوال بنسټونه او سازمانونو هم خپل فعالیتونه دروي، د وزګارتیا کچه لوړه شوې ده.
په ورته مهال له حکومتي ادارو د پخوانیو کارکوونکو لرې کول او پر ځای یې د اسلامي امارت اړوند کسان ګومارل هغه بله ستونزه ده چې ځوانانو له امله نیوکه کوي.
د روزګان یوشمېر ځوانانو دغه ولایت ته د اطلاعات او فرهنګ وزارت د ځوانانو معین محمدیونس راشد د سفر پر مهال نیوکه وکړه چې د اسلامي امارت په راتګ سره ګڼشمېر ځوانان دولتي ادارو کې له دندو ګوښه او پر ځای يې د امارت کسان معرفي شوي دي.
دوی له دولتي ادارو د پخوانیو کارکوونکو د ګوښه کېدو او د اسلامي امارت اړوند کسانو د ګومارنې په اړه د څېړنې غوښتنه وکړه.
د روزګان اوسېدونکي وليمحمد پخلا وویل: «هر ځای چې يو ځوان ورځي د هغه څخه د جهاد پوښتنه کېږي ايا دلته ځوانان د وظيفې حق نهلري، که حق لري ولې د جهاد پوښتنه کېږي او که يې نهلري، موږ به هېواد پرېږدو. ولې زموږ څخه د جهاد پوښتنه په ادارو کې کېږي دغه تېره اوونۍ په روزګان کې يوه کمېسيون شته دغه کمېسون ټول د پخواني اداري مامورين لرې کړل.»
سلاموطندار پر ټویټر هم وڅارئ
د اسلامي امارت حکومت په وار وار هېواد کې د کاري فرصتونو د رامنځته کېدو ژمنه کړې او بهر کې له مېشتو افغان سودګرو یې هم غوښتنه کړې چې هېواد کې پانګونه وکړي، خو بل لور ته بیا هره ورځ ګڼشمېر ځوانان د کار لپاره په ناقانونه لارو بهرنیو هېوادو ته د سفر تکل کوي.
