د بلخ محلي مسوولان وايي چې د هرات زلزلهځپلیو سره د مرستو په لړ کې د قزاقستان د بشردوستانه مرستو یوه جوپه دغه ولایت ته رارسېدلې ده.
د بلخ د والي مرستیال نورالهادي ابوادریس وايي، دغه مرسته چې ۲۷ واګونه خوراکي او البسه توکي دي، نن شنبه د تلې ۲۹مه د قزاقي چارواکو لهخوا د یاد ولایت حیرتان بندر کې افغان لوري ته سپارل شوې دي.
د سلاموطندار پښتو فېسبوکپاڼه وڅارئ
بلخ کې چارواکو ته د یادو مرستو سپارلو پر مهال د قزاقستان استازي میرام اشخمنوف وویل چې دغه مرسته یې د یاد هېواد د ولسمشر په لارښوونه د هرات زلزلهځپلیو څخه د لاسنیوي لپار افغانستان ته استولې دي.
نوموړي زیاته کړې چې دغو مرستو کې اوړه، غوړي، شیدې، جامې، کمپلې، چپرکټ، وریجې او خېمې شاملې دي چې په وینا یې، بلخ کې د سرپرست حکومت ته سپارل شوې دي.
بلخوا بلخ کې چارواکو د قزاقستان له دې مرستې د مننې ترڅنګ ویلي، هڅه کوي، څو دغه مرستې ژر تر ژره د هرات زلزلهځپلیو ته ورسوي.
له دې وړاندې هم قزاقستان د هرات زلزلهځپلیو ته د طبي تجهیزاتو او درملو مرسته کړې وه. تاجکستان، ایران، ترکیه، چین، اروپايي ټولنې او ځینو نورو هېوادونو هم د هرات زلزلهځپلیو سره مرستې کړې دي.