د لوګر پوهنې ریاست چارواکي وایي چې د دغه ولایت د پوهنې ریاست کارکوونکو او ښوونکو د یوې پرېکړې له مخې د خپلې یوې ورځې معاش د هرات زلزلهځپلیو کورنیو ته د مرستې په توګه ځانګړی کړی دی.
د لوګر د پوهنې ریاست ویاند شاهپور عرب سلاموطندار ته ویلي چې دا پرېکړه د یاد ولایت پوهنې ریاست کارکوونکو او ښوونکو په خپله خوښه کړې او په وینا یې، یاده پرېکړه یې پوهنې وزارت سره هم شریکه کړې ده.
عرب زیاته کړه، چې د لوګر د پوهنې ریاست د کارکوونکو او ښوونکو د یوې ورځې معاش ۱.۲ میلیونه افغانۍ کېږي چې ډېر ژر به د لوګر مستوفیت له لارې د هرات ولایت زلزلهځپلیو کورنیو ته ورسېږي.
باید وویل شي چې د تېرو دوه ورځو راهیسې د لوګر په مرکز پلعلم کې د اطلاعاتو او فرهنګ ریاست په مشري د هرات او بادغیس ولایتونو زلزلهځپلیو سره د مرستو راټولولو لپاره صندوق کېښودل شوي دي.
سلاموطندار پر ټویټر هم وڅارئ
تراوسه د دولتي او نادولتي ادارو کارکوونکو، سوداګرو او عامو خلکو د هرات زلزله ځپلیو سره د کېښودل شوي صندوق له لارې مرسته کړې او دا لړۍ لاهم روانه ده.