د کندهار د کرنې، اوبولګولو او مالدارۍ ریاست مسوولان وايي چې د دغه ولایت په خاکرېز ولسوالي کې د یوولس میلیونه افغانیو په لګښت، یو چکډېم جوړ او ګټېاخیستنې ته سپارل شوی دی.
دغه چکډېم د ملګروملتونو د پراختیایي پروګرام (UNDP) په مالي ملاتړ، د طبیعي سرچینو امریت تر څار لاندې، د خاکریز ولسوالي د چهاربند په سیمه کې جوړ شوی دی.
د کرنې ریاست ویاند، محمدحنیف حقمل وايي: «دغه چکډیم ۵۶ متره اوږد، ۱۲ متره لوړ او ۱۲ متره پراخ دی چې په یوه وخت کې ۵۰زره متره مکعب اوبه زېرمه کولی شي.» د نوموړي په وینا، د ودانیزو چارو معیارونه د تخنیکي څارنې لاندې رعایت شوي، څو چکډیم اوږدمهاله پایښت ولري.
دغه بند به د چهاربند سیمې سلګونه کروندګرو او مالدارانو د کرنیزو چارو لپاره د اوبو ستونزي حل کړي. د نوموړي په خبره، دا چکډېم د کرنیزو ځمکو د خړوبولو ترڅنګ د ځمکې لاندې اوبو د سطحې په لوړولو، د سېلابونو د تخریبي اغېزو په مخنیوي او د وچکالۍ پروړاندې د مقاومت لپاره جوړ شوی دی.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د سیمې یوه کروندګر رحمتالله وویل: «د کلونو راهیسې له وچکالۍ کړېږو، کوهي وچي شوي، اوبه نشته، ځمکه کَر نه کوي. اوس دا چکډیم زموږ لپاره د ژوند نوې هیله ده.»
بلخوا د اوبولګولو یو کارپوه، انجینر فضلالرحمن سلاموطندار ته وویل: «په روان اقلیمي بحران کې دا ډول بندونه تر ټولو ارزانه، مؤثره او پایدارې حللارې دي. دا نه یوازې اوبه ذخیره کوي، بلکې د اقلیم له بدلون سره د تطابق ستر تمرین هم ګڼل کیږي.»
داسې حال کې چې د افغانستان سوېلي سیمې له سختې وچکالۍ سره مخ دي، د خاکرېز په څېر پروژې نهیوازې د کروندګرو اقتصادي ژوند ته سا ورکوي، بلکې دا هم څرګندوي چې د انساني ریاضت، نړیوال ملاتړ او هوښیار مدیریت له لارې، د طبیعت له سختو ازموینو سره مؤثره مقابله ممکنه ده.
