کابل ښاروالي نن د کابل ښار په کچه د نیالګیو کېنولو یو میاشتنی کمپاین پیل کړ چې پر مټ به د پلازمېنې په بېلابېلو سیمو کې مثمر او غیر مثمر نیالګي کېنول شي.
مسوولان وايي، د ښار ښکلا په موخه به سږ کال د نیالګیو کېنولو کمپاین پر مهال نږدې ۶۰۰زره مثمر او غیرمثمر نیالګي د ټول کابل ښار په کچه کېنول شي.
د کابل ښاروالي د چاپېریال ساتنې او ښاري خدمتونو وړاندې کولو معین خالد سجستاني وویل: «نن په پلازمېنه کې د نیالګیو کېنولو سرتاسري کمپاین نن پیل شو چې ۱۴۰۲ کې به ټول کابل کې به ۶۰۰زره مثمر او غیرمثمر نیالګي کېنوي.»
په ورته وخت کې یوشمېر کابل ښاریان د نیالګیو کېنولو کمپاین پیلولو څخه د هرکلي ترڅنګ غوښتنه کوي چې دغه کمپاین کې برخه واخلي.
د کابل ښار اوسېدونکي عبدالرازق وویل: «ډېر خوشحاله یم چې د کابل ښاروالي له لوري د نیالګیو کېنولو کمپاین پیل شو او موږ هم وغوښتل چې دې پروګرام کې برخه واخلو او د کابل له نورو اوسېدونکو هم غواړو چې د کابل ښکلا لپاره یو یو نیالګی کېنوي.»
سلاموطندار پر ټویټر هم وڅارئ
د یادونې وړ ده چې کابل ښاروالي هر کال د نیالګیو کېنولو کمپاین پر مهال پلازمېنه کابل ښار کې سلګونه زره مثمر او غیرمثمر نیالګي کېنوي، خو څه موده وروسته د اوبو رسولو پروګرام نهشتون له امله، زیاتره دغه نیالګي وچیږي.
