د اسلامي دولت نومي ډلې (داعش) اعلان کړی چې د یادې ډلې مشر ابوالحسن الهاشمي القرشي په یوې نښته کې وژل شوی دی.
د فرانسې خبري اژانس د راپور پر بنسټ، د داعش ډلې ویاند ابوعمر المهاجر پرون چهارشنبه د نومبر۳۰مه پرته له دې چې د یادې ډلې د مشر د وژنې څرنګوالی او نېټه په ډاګه کړي، ویلي چې نوموړی د «خدای له دښمنانو سره په نښته» کې وژل شوی دی.
ابوعمر المهاجر په یوه غږیز پیغام کې د خپل وژل شوي مشر ځایناستی هم معرفي کړی او ابوالحسین الحسیني القرشي یې د یادې ډلې د نوي مشر په توګه یاد کړی دی.
د داعش ډلې مخکینی مشر ابوابراهیم القرشي د روان میلادي کال په لومړیو کې د سوریې په ادلب ښار کې د امریکايي ځواکونو د یوه برید پر مهال ووژل شو.
سلاموطندار پر ټوېټرپاڼه هم وڅارئ
همداراز د یادې ډلې لومړی مشر ابوبکر البغدادي د ۲۰۱۹ کال په اکتوبر میاشت کې د امریکايي ځواکونو په عملیاتو کې ووژل شول.
