د لوګر پوهنې ریاست چارواکي وایي چې د ماشومانو لپاره ملګروملتونو ملاتړې ادارې (UNICEF) له لوري د محمداغې، خوښۍ او ازرې ولسوالیو سلګونه ښوونکو او د ښوونځيو د شوراګانو غړیو ته د ماشومانو د حقونو په اړه څلور ورځنۍ روزنه ورکړل شوه.
د دغه ولایت پوهنې ریاست ویاند شاهپور عرب سلاموطندار ته وویل: «په جوړ شوي پروګرام کې نږدې ۳سوه ښوونکو، ۶۲ د ښوونځيو مدیرانو، ۹ د پوهنې ریاست اړوند امرینو او پاتې د ښوونځيو شوراګانو غړیو ګډون کړی وو.»
د سلاموطندار پښتو فېسبوکپاڼه وڅارئ
عرب زیاته کړه، په یادو شویو ولسوالیو کې ګډونوالو ته د ماشومانو د حقونو په ځانګړې توګه خوندیتوب، ساتنې، روزنې او د لېکلوست برخه کې معلومات ورکړل شوي دي.
نوموړي وویل چې په پام کې ده، ورته پروګرامونه د لوګر په پاتې ولسوالیو کې هم جوړ شي.
د جوړ شوي پروګرام یوه ګډونوال محمدرسول سلام وطندار ته وویل، د ټولنې ټول وګړي باید ماشومان ته ورکړل شوي حقونه ورکړي او په ماشومانو سخت او درانه کارونه ونهکړي.
د نوموړي په وینا، اوس ټولنه کې د ماشومانو روان وضعیت د اندېښنې وړ دی او باید هر ماشوم ته د لیکلوست ترڅنګ د ښه ژوند کولو اسانتیاوې هم رامنځته شي.