کابل کې د پاکستان پر سفیر عبیدالرحمان نظاماني له وسلهوال برید وروسته نوموړی اسلاماباد ته تللی او بهرنیو چارو کې د پاکستان د دولت له وزیرې حنا رباني کهر سره یې لیدلي دي.
حنا رباني کهر پنجشنبه د لیندۍ ۱۷مه پر خپله ټوېټرپاڼه لیکلي: «پاکستان ویاړي چې داسې ډيپلوماټان لري او په مېړانې او زړورتیا سره خپل هېواد ته خدمت کوي.»
بهرنیو چارو کې د پاکستان د دولت وزیرې ټينګار کړی چې د دغه هېواد لومړیتوب دا دی چې د خپلو ډيپلوماټانو امنیت خوندي کړي.
د روانې لیندۍ میاشتې په یوولسمه د جمعې پر ورځ کابل کې د پاکستان سفارت ته نږدې د دغه هېواد سفیر تر وسلهوال برید لاندې راغی. دغه برید کې سفیر ته زیان نه دی اوښتی، خو ساتونکی یې ټپي شوی دی.
پاکستان د خپل سفیر ساتونکی چې برید کې ټپي شوی و، په یوې الوتکه کې له کابله اسلاماباد ته انتقال کړی دی. حنا رباني کهر د دغه کس نوم «اسرارمحمد» یاد کړی او ویلي یې دي چې وضعیت یې په ښه کېدو دی.
داعش ډلې کابل کې د پاکستان پر سفارت د برید مسوولیت پر غاړه اخیستی. دغې ډلې په یوې ویناپاڼه کې ویلي چې د پاکستان پر سفارت برید د دوی کار و او زیاته کړې یې ده چې سفیر او ساتونکو باندې یې برید کړی دی.
سلاموطندار پر ټوېټرپاڼه هم وڅارئ
اسلامي امارت هم څو ورځې وړاندې اعلان وکړ چې کابل کې د پاکستان پر سفارت برید کوونکی یې نیولی دی. د اسلامي امارت د مسوولانو په وینا، نیول شوی کس بهرنی دی او د داعش ډلې غړی دی.
