د هرات د سوداګرۍ او پانګونې خونې مسوولان وايي چې د دې ولایت تازه مېوې اوس په پراخه کچه نړیوالو بازارونو ته صادریږي.
د یادې خونې اجرائیوي رییس، محمدیوسف امین سلاموطندار ته وايي چې د روان کال د لومړنیو پنځو میاشتو په جریان کې د هرات تازه مېوو صادرات ۵۴۴ ټُنه او ۷۲۲ کیلوګرامه ته رسېږي، پداسې حال کې چې په ورته موده کې د تېرکال صادرات یوازې ۷۲ ټنه وو.
د امین په وینا، د دغو صادراتو ټول ارزښت نږدې ۳۰۰زره امریکایي ډالر دی چې پهکې مڼه، الوبالو، خټکی، هندوانه، الو او زردالو شامل دي.
هغه زیاته کړه چې د هرات تازه میوې د قزاقستان، روسیې، متحده عربي اماراتو، سعودي عربستان او عراق بازارونو ته صادریږي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د هرات د سوداګرۍ او پانګونې خونې مسوولانو هیله څرګنده کړې چې د صادراتو دغه کچه به په راتلونکو کلونو کې لا نوره هم زیاته شي او د هرات کروندګرو لپاره به نوي اقتصادي فرصتونه رامنځته کړي.
د هرات د سوداګرۍ او پانګونې خونه همدارنګه په دوامداره توګه هڅه کوي چې د صادراتو د کیفیت او نړیوالو معیارونو په برخه کې تازه میوې نور هم پیاوړي کړي، څو د نړیوالو بازارونو د غوښتنې سره سمون ولري.
