د افغاني سرې میاشتې ټولنې مسوولان وايي چې د هرات په زلزلهځپلیو سیمو کې د لټون او ژغورنې عملیات پای ته رسېدلې دي.
د یادې ټولنې د مسوولانو په وینا، په دې زلزله کې څه باندې ۲۴۰۰ کسان مړه شوي او سلګونه نور ټپیان دي.
دوی همداراز زیاته کړه چې د شنبې ورځې په شوې زلزله کې د هرات په بېلابېلو سیمو کې ۱۳ کلي په بشپړه توګه ویجاړ شوې دي.
د افغاني سرې میاشتې ټولنې ویاند عرفانالله شرفزوی سلاموطندار ته وویل: «په لومړۍ او دویمه ورځ مو ۱۴ ټیمونه لرل چې اووه یې د ژغورنې او اووه نور یې روغتیايي ټیمونه وو، ۱۶ نور ټیمونه هم له نورو ولایتونو هلته لېږدول شوي، اوس هرات کې د ژغورنې عملیات پای ته رسېدلي او د افغاني سرې میاشتې ټولنې رییس سیمه کې دی او چارې تنظیموي.»
د شرفزوی په وینا، په ځینو سیمو کې په فرعي توګه عملیات لاهم روان دي. هغه زیاته کړه چې عملیات په بریالي توګه پای ته رسېدلي او په وینا یې، څوک تر خاورو لاندې نهدي پاتې.
همداراز د افغاني سرې میاشتې ټولنې د معلوماتو له مخې، تراوسه په دغه زلزله کې د مړو شویو کسانو شمېر له ۲۴۰۰ کسانو اوښتی دی.
په ورته مهال له لومړۍ خونړۍ زلزلې ورووسته څو ځله په پرلهپسې توګه دغه ولایت کې زلزلې شوې دي.
تازه نن دوشنبه د تلې ۱۷مه هرات کې یو ځل بیا زلزله شوې ده. تراوسه د یادې زلزله له کبله د اوښتو زیانونه په اړه معلومات په لاس کې نشته.
سلاموطندار پر ټویټر هم وڅارئ
ویل کېږي چې د یادې زلزلې مرکز د رباط سنګي ولسوالي وه او د زلزلې ټکانونه د یادې ولسوالي په لس کیلومټرۍ کې هم حس شوې دي.