د سرپل محلي مسوولان وايي چې د دغه ولایت مرکز اړوند «تاشګذر» کلي کې یې د ۴۸۰زره امریکايي ډالرو په ارزښت د ۲.۵ کیلومټره سړک د رغونې چارې پیل کړي دي.
دغه سړک چې د سرپل مرکز سره څو کلي نښلوي د کانکرېټ اچوونې چارې یې پرون سهشنبه د وږي ۲۱مه پیل شوې دي.
د سلاموطندار پښتو فېسبوکپاڼه وڅارئ
د یاد سړک د رغنیزو چارو د پرانېستو مراسمو پر مهال د «افچین» شرکت مدیر فریدالله وویل چېد یاد سړک چارې د «اسیااباد» له سیمې پیل او تر «قشقري» پورې به دوام ولري.
د نوموړي په وینا، د یاد سړک د رغونې چارې به تر راتلونکو درېوو میاشتو پورې بشپړې او ګټې اخیستنې ته به وسپارل شي.
د افچین شرکت مدیر همداراز زیاته کړه چې دغه پروژه د قشقري د نفتو پراختیايي پروژې اړوند ده چې بودیجه یې د «افچین شرکت له لوري ورکول کېږي او ورسره لسګونه کسانو ته د کار زمینه هم برابره شوې ده.
د سرپل والي محمدیعقوب عبدالرحمن اکه دې مراسمو کې د سیمې له خلکو غوښتنه وکړه چې د یادو پروژو د پلي کولو برخه کې له محلي مسوولانو او شرکت سره همکاري وکړي، څو د یاد سړک د رغونې چارې په سمه توګه پرمخ لاړې شي.
بلخوا د سیمې یوشمېر اوسېدونکي د یادې پروژې له پلې کېدو خوښ دي او له اړوند مسوولانو غواړي چې سیمه کې دې یې ورته نورې پروژې هم پلې شي.
دغه سړک د قشقري د نفتو کان ته څېرمه پروت دی چې هره ورځ پرې لسګونه ټانکر تګراتګ کوي.