د اسلامي امارت کابینې نن په خپله ناسته کې هېواد ته د افغانستان د شخصیتونو د رابللو په موخه د اړیکو او راستنولو کمېسیون د جوړېدو طرحه تصویب کړه.
د اسلامي امارت د کابینې ناسته نن چهارشنبه د اسلامي امارت د رییسالوزرا محمدحسن اخوند په مشري ترسره شوه.
د سلاموطندار پښتو فېسبوکپاڼه وڅارئ
په دې ناسته کې پرېکړه وشوه چې هېواد ته د افغانستان د بېلابېلو شخصیتونو د بېرته راګرځولو په موخه د شهابالدین دلاور په مشري دې کمېسیون جوړ شي.
په دغه ناسته کې همداراز پرېکړه وشوه چې له دې وروسته د اسلامي امارت نظامي کسان نشي کولای، په خپلو نظامي موټرو کې د اسلامي امارت د مشرانو تصویرونه ولګوي او دفاع، کورنیو چارو وزارتونو او د استخباراتو ریاست ته دنده وسپارل شوه چې په دې برخه کې د خپلو ځواکونو مخه ونیسي.
یاده ناسته کې همداراز د مدافع وکیلانو د انسجام مقرره له تعدیل وروسته تصویب او همداراز اقتصادي کمېسیون ته دنده ورکړل شوه چې د اقتصادي زونونو د رامنځته کولو په برخه کې د صنعت او سوداګرۍ وزارت وړاندیز وڅېړي
