د امریکا ولسمشر ډونالډ ټرمپ ویلي، اسراییل او لبنان د دریو نورو اوونیو لپاره د اوربند پر تمدید هوکړه کړې.
ټرمپ ویلي چې دغه توافق د اسراییل او لبنان د استازو ترمنځ د نوو مذاکراتو په پایله کې رامنځته شوی چې د امریکا د لوړپوړو چارواکو په منځګړیتوب په واشنګټن کې ترسره شوي وو.
د امریکا ولسمشر ویلي، متحده ایالات به له لبنان سره همکاري وکړي څو وکولی شي د حزبالله پر وړاندې خپل دفاعي ظرفیت پیاوړی کړي.
ټرمپ همدارنګه هیله څرګنده کړې چې نږدې راتلونکي کې د لبنان ولسمشر جوزف عون او د اسراییل لومړی وزیر بنیامین نتنیاهو واشنګټن کې سره لیدنه وکړي.
د امریکا په منځګړیتوب د اسراییل او لبنان ترمنځ اوربند لومړی د لسو ورځو لپاره شوی و او اوس د درې نورو اوونیو لپاره تمدید شوی دی.