د ایران د بهرنیو چارو وزارت سرپرست علي باقري د ا.ا د بهرنیو چارو له سرپرست امیرخان متقي سره په ټیلیفوني خبرو کې ویلي، افغانان د خپل هېواد په اړه د پرېکړې اصلي سرپرستان دي او له سیمې دباندې بهرنیو لوبغاړیو ته د لاسوهنې اجازه نه ورکوي.
د سلاموطندار پښتو فېسبوکپاڼه وڅارئ
نوموړي دا موضوع پر خپل اېکس لیکلې او زیاته کړې یې ده: «افغانان له ګاونډیو او د سیمې هېوادونو سره په همکارۍ د خپل هېواد په اړه اصلي پرېکړهکوونکي دي او له سیمې دباندې بهرنیو لوبغاړیو ته چې د تخریبوونکو لاسوهنو سابقه لري او د افغانستان د اوسنيو ستونزو مسوولان دي، د لاسوهنې اجازه نه ورکوي.»
هغه زیاته کړې چې ایران او افغانستان ګډو دیني، تمدني او فرهنګي ټکو ته په پام یو له بل سره په همغږۍ و همکارۍ د سیمې د ثبات او امنیت لپاره هڅې کوي.
د ایران د بهرنیو چارو وزارت سرپرست په دغو ټیلیفوني خبرو کې ټینګار کړی چې اسلامي هېوادونه باید د فلسطینیانو د ملاتړ او «یرغلکوونکي رژیم له جنایتونو» سره د مقابلې برخه کې مخکې واوسېږي.
علي باقري له دې مخکې د افغانستان په اړه د سیمې د تماس ډلې په غونډه کې چې په تهران کې جوړه شوې وه، هم ویلي و چې د افغانستان نه پرمختګ او اقتصادي ستونزو پړه پر دغه هېواد د «یرغلکوونکو» پر غاړه ده او د بیالاسوهنې فرصت باید ورته برابر نهشي.
