د اسټرالیا په کوربهتوب د روان ۲۰۲۲ کال شل اووره نړیوال جام سیالیو په لړ کې نن د افغانستان کرېکټ ملي لوبډله د انګلستان پر وړاندې خپله لومړۍ سیالي کوي.
ټاکل شوې چې دغه سیالي د افغانستان پر وخت نن له غرمې وروسته ۳.۳۰ بجې پیل شي.
یاده سیالي د اسټرالیا په پرټ لوبغالي کې کېږي چې شاوخوا د ۶۰۰۰۰ نندارچیانو لپاره جوړ شوی دی. د افغانستان د کرېکټ ملي لوبډلې له دې وړاندې په خپلو وروستیو پنځو سیالیو کې درې بایللي او دوه یې ګټلي دي.
انګلستان بیا وروستیو پنځو لوبو کې څلور ګټلي او یوه لوبه یې د باران له امله لغوه شوې ده.
افغانستان او انګلستان تر دې مهاله د شل اووره نړیوالو سیالیو په لړ کې دوه ځلې سره مخ شوي چې دواړه لوبې یې د انګلستان په ګټه پای ته رسېدلې دي.
انګلستان په ۲۰۱۲ کې لومړي شل اووره سیالي له افغانستان څخه د ۱۱۶ منډو په توپیر او دویمه سیالي یې په ۲۰۱۶ کال کې د ۱۵ منډو په توپیر له افغانستانه ګټلې دي.
