د تخار محلي مسوولان وايي، پرون یې د دغه ولایت د فرخار ولسوالي د «لُژده» سیمې په یوه سیند کې د یوې ښځې او د هغې د درېوو ماشومانو جسدونه موندلي او خاورو ته یې سپارلي دي.
د تخار د فرخار ولسوال سیفالدین مشتاق سلاموطندار ته ویلي، د فهیمې په نوم یوې ښځې دوه ورځې وړاندې په سیند کې د یوې کوچنۍ لور له غرقېدو وروسته ځان او خپل دوه نور ماشومان چې یو یې هلک او بله نجلۍ وه، هم اوبو ته ورغورځولي دي.
د سلاموطندار پښتو فېسبوکپاڼه وڅارئ
د هغه په وینا، فهیمې ۲۵ کاله عمر درلود او د کندوز اصلي اوسېدونکې وه. مشتاق زیاتوي، یاده ښځه چې کله په اوبو کې د لور له غرقېدو خبرېږي، ځان او دوه نور ماشومان هم ورغورځوي. نوموړی وايي، د یادې ښځې خاوند د پېښې پر مهال په کور کې نه و.
د تخار امنیه قومانداني وايي، تر اوسه د دې پېښې انګېزه نه ده معلومه. د تخار د پولیسو ویاند خلیل اسیر د پېښې د تایید تر څنګ، وايي چې په اړه یې څېړنې پیل شوې دي.
په همدې حال کې د «لُژده» سیمې اوسېدونکي وايي، کله چې فهیمه په سیند کې د خپلې کوچنۍ لور له غرقېدو خبره شوې، لومړی یې کور ته اور اچولی او بیا یې ځان او دوه نور ماشومان هم اوبو ته ور غورځولي دي.
