د هلمند محلي مسوولان وايي چې د دغه ولایت په اړوند سیمه کې یوه کس خپله مېرمن وژلې ده. پېښه بېګاه شپه د یاد ولایت موسیکلا ولسوالي کې رامنځته شوې.
د هلمند د اطلاعاتو او فرهنګ ریاست مرستیال مولوي محمدقاسم ریاض ویلي چې بېګاه شپه د هلمند موسیکلا ولسوالي د توغي کلي د «شباروز» په سيمه کې یوه مېرمن د خپل خاوند لهخوا په تبر وهل شوې او وژل شوې ده.
د سلاموطندار پښتو فېسبوکپاڼه وڅارئ
محمدقاسم ریاض زیاته کړې چې پېښه د کورني تاوتریخوالي له کبله رامنځته شوې ده. د هلمند د اطلاعاتو او فرهنګ ریاست مرستیال په وینا، د یادې مېرمنې خاوند د امنیتي ځواکونو له لوري نیول شوی او دا مهال ترې پوښتنې ګروېګنې روانې دي.
دا په داسې مهال دی چې له دې وړاندې هم دغه ولایت او د هېواد په نورو سیمو کې هم ورته پېښې رامنځته شوي چې مسوولان یې لامل تر ډېره کورنۍ تاوتریخوالی، بېوزلي او د نشهيي توکو کارونه په ګوته کوي.