د بلخ د عامې روغتیا ریاست مسوولان وايي چې د دغه ولایت د دهدادي ولسوالي په «کود برق» سیمه کې یې یو ۵۰بستریز روغتون ګټې اخیستنې ته سپارلی دی.
د بلخ د عامې روغتیا رییس نجیبالله توانا وايي چې دغه روغتون د عامې روغتیا وزارت له لوري د ۱۰۹ میلیونه افغانیو په لګښت جوړ شوی دی.
د سلاموطندار پښتو فېسبوکپاڼه وڅارئ
توانا وايي چې د یاد روغتون په جوړېدو سره د کود برق سیمې څه باندې ۱۰۰۰ کورنیو ته د روغتیايي خدمتونو زمینه برابره شوې ده.
د بلخ د عامې روغتیا رییس په وینا، هڅه کوي چې د یاد ولایت لرو پرتو سیمو ته روغتیايي خدمتونه پراخ کړي او زیاتوي چې دغه روغتون کې مجهیز امکانات او مسلکي روغتیايي کارکوونکي پر دندو ګومارل شوي دي.
په ورته مهال د یاد روغتون د پرانېستلو پر مهال د عامې روغتیا وزارت مالي او اداري معین محمداسحاق اخندزاده وویل چې بهرنیو هېوادونو ته د درملنې لپاره د افغانانو د تلو مخنیوی په پار هڅه کوي چې هېواد کې روغتیايي خدمتونه پراخ او معیاري کړي.
بلخوا د دهدادي ولسوالي د کودبرق سیمې اوسېدونکي د یاد روغتون له جوړېدو خوښي څرګندوي او وايي چې له دې وړاندې له ګڼو روغتیايي ستونزو سره لاس او ګرېوان وو چې اوس یې دغه ستونزې حل شوي دي.