چین په تېرو دوو ورځو کې د روسيې د ولسمشر ولاديمير پوتين کوربه و. چین ته د پوتین د سفر موخه د دواړو هېوادونو پر دوهاړخيزو اړيکو او ځينو سيمهييزو او نړيوالو مسايلو خبرې بلل شوې دي. د روسیې ولسمشریزې ماڼې یا کرېملېن له دغه سفر وروسته د دواړو هېوادونو ګډه خبرپاڼه خپره کړې چې افغانستان هم د دواړو هېوادونو د مشرانو د بحث موضوع وه.
په دې خبرپاڼه کې ټینګار شوی چې امریکا او ناټو په افغانستان کې په شل کلن اشغال سره د دغه هېواد د اقتصادي او ټولنیزو ستونزو لامل شوی او امریکا دې په افغانستان کې د پوځي اډو جوړولو هڅه نه کوي.
د سلاموطندار پښتو فېسبوکپاڼه وڅارئ
په خپره شوې خبرپاڼه کې لیکل شوي: «امریکا او ناټو د افغانستان د شل کلن اشغال مسوولیت لري. دوی باید بیا په افغانستان کې د پوځي بنسټونو د جوړولو فکر ونه کړي. دوی باید د هغو ټولنیزو او اقتصادي ستونزو مسوولیت ومني چې افغانستان اوس ورسره مخامخ دی.»
د روسیې او چین مشرانو دا څرګندونې کړي چې د نړۍ زبرځواکونه تل د افغانستان په اړه د نظر اختلاف او سیالي لري. یوشمېر کارپوهان پر دې باور دي چې د فغانستان په اړه د ځواکمنو هېوادونو دا ډول څرګندونې هم د هغوی د سیالۍ پر بنسټ کېږي.
د چارو شنونکی محمدزلمی افغانیار پوپل وايي: «چین او روسیه هغه هېوادونه دي چې د ملګرو ملتونو په امنیت شورا کې د وېتو حق لري. دغو هېوادونو هېڅکله د افغانستان د ناورین مدیریت لپاره کوم پلان نه درلود، بلکې تل یې ناورین زېږولی.»
په ورته وخت کې یوشمېر نور کارپوهان ټینګار کوي چې اوسنی حکومت باید په افغانستان کې د هېوادونو د پوځي لاسوهنو د مخنیوي لپاره د کورنیو ستونزو په حلولو سره په هېواد کې د سیاسي ثبات د ټینګښت هڅې وکړي.
د امنیتي او سیاسي چارو کارپوه عزیز ستانکزی وايي: «کورني مسایل باید حل کړي؛ که هغه د خلکو ناخوښي وي یا بل څه. هر حکومت چې د خلکو غوښتنو ته پام ونه کړي، له ستونزو سره مخامخېږي. د ستونزو د حل لپاره باید د خلکو غوښتنو ته پام وشي او هغوی له خپل شرعي او قانوني حق څخه بېبرخې نهشي.»
دا په داسې حال کې ده چې تر دې مخکې د امریکا پخواني ولسمشر او د دغه هېواد د ولسمشرۍ ټاکنو اوسني نوماند ډونالډ ټرمپ د تېر کال د لړم میاشتې په ۲۷مه په یوه ټاکنیزه غونډه کې ویلي و چې که ټاکنې وګټي، د بګرام پوځي اډه به له ا.ا سره په تعامل کې بېرته ترلاسه کړي.
