د سرپرست حکومت د بهرنیو چارو وزارت د روسیې پلازمېنه مسکو کې پر یوه کنسرټ وسلهوال برید غندلی او هغه یې ترهګریز بللی دی.
د یاد وزارت ویاند عبدالقهار بلخي نن شنبه، مارچ ۲۳مه پر خپله اېکسپاڼه لیکلي چې دغه برید د ټولو بشري حقونو له موازینو ښکاره سرغړاوی او نقض دی.
د سلاموطندار پښتو فېسبوکپاڼه وڅارئ
د نوموړي پر اېکسپاڼه خپره شوې خبرپاڼه کې ویل شوي: «داعش چې افغانستان او د نړۍ نورو سیمو کې ملکیان هم په نښه کړي، یو ځل بیا دا ښکاره پېښه ښيي چې دا ډله د اطلاعاتي سازمانونو په لاس کې ده او هدف یې د اسلام بدنامول او د سیمې لپاره د ګواښ رامنځته کول دي.»
د سرپرست حکومت د بهرنیو چارو وزارت همداراز دې خبرپاڼه کې د سیمې له هېوادونو غوښتنه کړې چې د ورته پېښو پر وړاندې همغږې کوونکې، روښانه او پرېکنده دریځ غوره کړي. د یاد وزارت په وینا، دغه پېښې د سیمې بېثباتۍ لپاره کېږي.
د راپورونو له مخې، د روسیې پلازمېنه مسکو کې بېګاه شپه پر یوه کنسرټ د وسلهوالو برید پر مهال ۶۰کسان وژل شوي او ۱۳۵ نور ټپیان دي.
ویل کېږي چې برید کې د وژل شویو او ټپیانو شمېر ښايي له دې هم لوړ شي.
د دې برید مسوولیت داعش وسلهوالې ډلې پر غاړه اخیستی دی.