د افغانستان کرېکټ ملي لوبډله د ۲۰۲۳ کال د یو ورځنیو سیالیو نړیوال جام ته د چمتووالي لپاره نن د سریلانکا کرېکټ ملي لوبډلې سره تمریناتي لوبه کوي.
ټاکل شوې چې دغه لوبه نن له غرمې وروسته ۱:۰۰ «سهشنبه د اکتوبر درېیمه» د هند د ګوواهاټي په «بارساپارا کرېکټ نړیوالي لوبغالي» کې ترسره شي.
له دې وړاندې د افغانستان لومړۍ تمریناتي لوبه د باران له کبله لغوه شوې وه. هغه لوبه یې د سوېلي افریقا کرېکټ ملي لوبډلې پر وړاندې وه.
سریلانکا په خپله لومړۍ تمریناني لوبه کې بیا له بنګلدېش ماته خوړلې. هند کې د باران له کبله دغه تمریناتي لوبې تر ډېره بېخوندې شوي دي. تراوسه بېلابېلې تمریناتي لوبې د باران له کبله لغوه او یا یې هم اورونه کم شوې دي.
بلخوا د نن ورځې په نورو تمریناتي لوبو کې بیا پاکستان له اسټرالیا او هند له نیدرلنډ لوبډلې سره مخ دي. پرون دوشنبه د اکتوبر دویمه هم دوه تمریناتي لوبې وشوې چې نیوزیلنډ سوېلي افریقا او انګلنډ بنګلدېش له ماتې سره مخ کړ.
سلاموطندار پر ټویټر هم وڅارئ
د هند په کوربهتوب د ۲۰۲۳ کال یو ورځنیو سیالیو نړیوال جام د روانې اکتوبر میاشتې په پنځمه به د لسو لوبډلو ترمنځ پیل شي چې د نومبر تر ۱۹ به دوام وکړي.
