د پاکستان د بلوچستان ایالت په لسبیله سیمه کې د یوې ټرافیکي پېښې پر مهال د ماشومانو په ګډون ۴۱ کسان مړه شوي دي.
پاکستاني رسنیو نن یکشنبه د سلواغې نهمه راپور ورکړی چې د بلوچستان په لسبیله سیمه کې یوې ژورې کندې ته د یوه موټر د لوېدو له امله ۴۱ کسانو خپل ژوند له لاسه ورکړی دی.
د لسبېلې سیمې یوه چارواکي حمزه انجم رسنیو ته ویلي، دغه بس موټر چې له کوټې کراچۍ ښار ته روان و چې د پُل یوې ستنې سره تر ټکر وروسته کندې ته لوېدلی دی.
د دغه چارواکي په وینا، موټر کې ۴۸ کسان سپاره وو چې ۴۱ کسان یې موټر کې د اور لګېدو له امله مړه شوي او د یوه ماشوم او ښځې په ګډون اووه کسان ژغورل شوي دي.
بلوچستان کې دغه پېښې داسې مهال رامنځته کېږي چې د دغه هېواد د رسنیو د راپورونو له مخې، د روانې جنورۍ میاشتې په یوولسمه او نهمه نېټه هم د دوو جلا ټرافیکي پېښو له امله یوولس کسان مړه او ۲۸ نور ټپیان شوي وو.
سلاموطندار پر ټوېټرپاڼه هم وڅارئ
پاکستان کې د ډېری ټرافیکي پېښو لامل د سړکونو خرابوالی او له ټرافیکي قوانینو څخه د موټر چلوونکو نه خبرتیا په ګوته کېږي.
