د غور د ولایتي شورا غړی عزتالله بېګ د ملي امنیت ځواکونو سره نښته کې ووژل شو
د ملي امنیت عمومي ریاست وايي چې د غور د ولایتي شورا غړی عزتالله بېګ په فېروزکوه ښار کې د ملي امنیت ځواکونو سره په نښته کې وژل شوی دی.
دغې ادارې نن په یوه خبرپاڼه کې ویلي چې د ملي امنیت ځانګړو ځواکونو غوښتل چې د غور د ولایتي شورا مرستیال عبدالرحمان عطشان او د غور غږ راډیو د مسوول بسمالله عادل ایماق «د ترور عامل» او د غور د ولایتي شورا غړی عزتالله بېګ ونیسي، خو هغه د تسلیمېدو پر ځای، د ملي امنیت پر ځواکونو بریدونه وکړل او د دواړو لوریو ترمنځ نښته کې ووژل شو.
