د «۳۱۳ مرکزي» قولاردو مرستیال امینالله طیب له سلاموطندار سره په ځانګړې مرکه کې ویلي چې د اختر شپو او ورځو کې د مرکزي زون په ځانګړې توګه د کابل امنیت خوندیتوب لپاره یې ۱۰زره سرتیري ګومارلي دي.
د ۳۱۳ مرکزي قولاردو مرستیال زیاته کړې، که څه هم د ا.ا په واکمنېدو سره هېواد کې امنیت ټينګ شوی، خو په وینا یې، بیا هم هڅه کوي چې د اختر شپو او ورځو کې هېڅ امنیتي پېښه رامنځته نهشي.
د سلاموطندار پښتو فېسبوکپاڼه وڅارئ
هغه وویل: «د امنیتي تدابیرو لپاره چې د ذيالحجې له لومړۍ تراوسه چې دوه ورځې اختر ته پاتې دي، د کابل ټولو سیمو او ښار دننه، د دفاع، کورنیو چارو وزارتونو او استخباراتو ګډ ځواکونه موظف شوي، څو هېڅ امنیتي ستونزه رامنځته نهشي.»
د نوموړي په وینا، د کابل ښار په کچه د پلټنې پوستې «چکپواینټونه» ډېر شوي او د اختر شپو او ورځو پر مهال به ټول امنیتي منسوبین پر خپلو دندو حاضر وي.
د ۳۱۳ مرکزي قولاردو مرستیال وویل: «د کابل ښار کې د لا ښه امنیت لپاره نږدې ۱۰زره سرتیري موظف شوي چې ټول به د اختر ورځو او شپو کې پر خپلو دندو وي او دې برخه کې هېڅ اندېښنه نشته او هېوادوالو ته ډاډ ورکوو چې له اندېښنې پرته د اختر ورځې ونمانځي.»
امینالله طیب د امنیت ټينګښت برخه کې د خلکو له همکاري مننه کوي او وايي چې خلک په دوامداره توګه له امنیتي بنسټونو سره همکاري کوي او د خلکو له همکاري پرته د امنیت ټينګښت اسانه نه دی.
د نوموړي په وینا، څه موده وړاندې یې د خلکو په همکاري د کابل ښار اړوند پلچرخي سیمه کې ځینې شکمن کسان هم ونیول چې خلکو یې د شکمنو فعالیتونو په اړه دوی ته خبر ورکړی و.
امنیتي بنسټونه داسې مهال د اختر ورځو کې د امنیت ډاډ ورکوي چې ښاریانو تل د امنیت ټينګښت برخه اندېښنه ښودلې او د پایښتلرونکي امنیت غوښتنه لري.