نړیوال بانک ویلي چې لومړنیو او منځنیو زدهکړو ته د افغان ماشومانو، په تېره نجونو د لاسرسي لپاره له افغانستان سره ۲۵ میلیونه ډالره مرسته کوي.
نړیوال بانک نن په یوه خبرپاڼه کې لیکلي، دا وړیا مرسته د زدهکړو لپاره د نړیوالۍ همکارۍ پروګرام له لارې ورکول کېږي او له اقرا پروژې سره به د ۱۰۰ نویو ښوونځیو په جوړېدو کې مرسته وکړي.
دغه راز، دا مرسته به په محلي کچه د زدهکړې کچې لوړوالي، زدهکړو ته د ماشومانو، په تېره نجونو ښه لاسرسي، د ښوونکو ښوونیزو پروګرامونو د ملاتړ او د ښوونیزو پروګرامونو د کیفیت لوړونې په برخه کې ولګول شي.
په خبرپاڼه کې د افغانستان لپاره د نړیوال بانک رییس هینري کرالي له قوله لیکل شوي: «افغانستان له دوو لسیزو راهیسې د زدهکړو کچې په ښهوالي کې ډېر پرمختګ کړی، خو اوس هم ۳،۵ میلیونه ماشومان په دغه هېواد کې له ښوونځي محروم دي او نیمايي ښوونځي یې هم د زدهکړو لپاره مناسبې ودانۍ نه لري.»
نړیواله پرمختیايي اداره، د افغانستان د بیارغاونې صندوق او د ښوونې لپاره د نړیوالې همکارۍ پروګرام د اقرا پروژې ملاتړ کوي.
د ښوونې لپاره د نړیوالې همکارۍ پروګرام اجرایوي رییسه وايي: «د نجونو پر زدهکړو پانګونه هغه تر ټولو مهمه برخه ده چې یو هېواد یې کولای شي، وکړي. نجونو ته د ښوونیزو پروګرامونو برابرول د اقتصادي پرمختیا، د ماشومانو د مړینې کموالي او د هغو د خوړو ښهوالي لامل ګرځي. د نړیوالې همکارۍ پروګرام ښوونې ته ژمن دی، څو په تر ټولو زیانمنو سیمو کې ښوونځي ته د میلیونونو نجونو او هلکانو د تګ لاره هواره او په دې برخه کې خپلې مرستې ته دوام ورکړي.»
د نړیوال بانک په خبرپاڼه کې ټینګار کړی چې د خپلو نورو پرمختیايي شریکانو په همکارۍ سره به ښوونې ته د لاسرسي او د زدهکړو کیفیت ښهوالي په برخه کې له افغانستان سره همکارۍ ته دوام ورکړي.
