د ننګرهار د ولایتي شورا رییس احمدعلي حضرت وايي، د ننګرهار د محبس مدیر د قتل په جرم پر ٢٥ کاله بند محکوم شوى بندي خوشې کړى او ورسره يوځاى تښتېدلى دى.
د هغه په وینا، د محبس مدیر احمدشاکر قاضيزاده یاد بندي د ۷۰ زره امریکايي ډالرو په بدل کې له بندخونې څخه د رخصتۍ په پلمه اېستلی دی. حضرت زیاتوي، امنیتي ځواکونو د پېښې په اړه له خبرېدو وروسته پرون د محبس پر مدیر احمد شاکر قاضيزاده چاپه وهلې، خو هغه ترې تښتېدلى دی.
احمدعلي حضرت وايي، امنیتي ځواکونو هڅه کړې چې خوشې شوی بندي او د محبس مدیر ونیسي، خو دواړه نامعلوم لوري تته تښتېدلي دي.
خو د ننګرهار د والي ویاند عطاالله خوږیاڼی وايي، د دغه ولایت د محبس مدیر د تېښتې په اړه خپاره شوي راپورونه ناسم دی او هغه خپلې دندې ته دوام ورکوي.
