افغان سولې لپاره د امریکا د بهرنيو چارو وزارت ځانګړي استازي زلمي خلیلزاد او افغانستان کې د ناټو غوڅ ملاتړ ماموریت قومندان سکاټ مېلر تېره ورځ د پاکستان د پوځ لوی درستیز قمر جاوېد باجوه سره لیدلي.
خلیلزاد تېره ورځ « پنجشنبه د تلې ۱۷مه» پاکستان ته تللی.
اسلاماباد کې د امریکا سفارت د دې کتنې په اړه یوه اعلامیه کې ویلي، دواړو خواوو افغانستان کې د تاوتریخوالي د کمېدو غوښتنه کړې او د افغانستان او پاکستان ترمنځ پر امنیتي ترتیباتو، د سیمې امنیت او د افغانستان د سولې پر پروسې یې خبرې وکړې.
همداراز دواړو خواوو بینالافغاني خبرې افغانستان کې د سولې لپاره یو تاریخي فرصت بللی او د هغو هېوادونو د ملاتړ غوښتنهیې کړې چې د افغانستان له سولې سره مرسته کولای شي.
خلیلزاد تر دې وړاندې قطر کې د افغان دولت او طالبانو مرکچي پلاوي د سولې خبرو کې د ولاړ حالت پای ته رسولو ته هڅولي دي.
د افغان سولې خبرې څه باندې یوې میاشتې راهیسې دوحه کې پیل شوي، خو لا هم دواړه خواوې د رسمي خبرو پر کړنلارې هوکړې ته نهدي رسېدلې.