بیرلشگن ملتلر تشکیلاتی ده افغانستان دایمی نماینده‌لیگی، افغانستان وضعیتی توغریسیده مذکور تشکیلات عمومی مجمع قطع‌نامه‌سی نینگ تصویب بولگنیدن خبر بیرگن.
مذکور قطع‌نامه ۱۳۱ آواز دن کویپنچه آواز بیلن تصویب بولگن کیم زوروانلیکلر میزانی کوپه‌یگنی، تینچ‌اهالی تلفات رقمی یوقاری کیتگنی و شونینگدیک ریجه‌لنگن ترولر خصوصیده خواطر بیلدیریلگن. مذکور قطع‌نامه‌ده برچه افغانستان اویینچی‌لریدن زوروانلیکلر تیزلیککه کمه‌یشی اوچون سعی و حرکت قیلیش‌لری سوره‌لگن.
افغانستان وضعیتی توغریسیده بیرلشگن ملتلر تشکیلاتی نینگ عمومی مجمع قطع‌نامه‌سینی ۶۸ ماده‌سی بار کیم افغانستان ده تینچلیک، خوفسیزلیک و زوروانلیکلرنینگ حاضرگی میزانی و شونگه اوخشه‌گن موضوعلر خصوصیده بحث قیلینگن.
دموکراسی، قانون حاکمیتی، یخشی حکومتدارلیک، انسان حقلری، مخدره ماده گه قرشی کوره‌ش، افغانستان ده اجتماعی و اقتصادی رواجله‌نیش، مهاجرلر و منطقه‌یی همکارلیکلر بو قطع‌نامه‌ده اشاره قیلینگن موضوع‌لردن دیر.
بیرلشگن ملتلر تشکیلاتی ده افغانستان دایمی نماینده‌لیگی بیر توییت آرقه‌لی یازیشیچه، مذکور قطع‌نامه نینگ سوزلشوولری بیرلشگن ملتلر تشکیلاتی ده آلمان دایمی نماینده‌لیگی آرقه‌لی رهبرلیک بولگن و ۷۰ دن آرتیق افغانستان نی مالی حمایت قیله‌دیگن مملکت و شونینگدیک باشقه نیچه مملکت بو قطع‌نامه دن حمایت بیلدیرگن.
قطع‌نامه نینگ کوپه‌یتیریشیچه: «طالبان اسلامی امارتی» بیرلشگن ملتلر تامانیدن رسمیت گه تانیلمه‌گن و بو تشکیلات نینگ عمومی مجمعی اونینگ قیته ایجاد ایتیلیشیدن حمایت قیلمه‌یدی.
افغانستان تشقی ایشلر وزیرلیگی هم بو قطع‌نامه نی خوش قرشی‌لگن. مملکت تشقی ایشلر وزیری محمدحنیف اتمر، بیر توییت آرقه‌لی بو قطع‌نامه نی تینچ و دموکراتیک بیر افغانستان اوچون خلق‌ارا جماعه‌سی نینگ وعده‌سی دیگن.
شونینگدیک ملی مصالحه عالی کینگش باشلیغی عبدالله عبدالله، بیر توییت یازیب افغانستان وضعیتی توغریسیده بیرلشگن ملتلر تشکیلاتی تامانیدن قطع‌نامه صادر ایتیلگنی نی خوش قرشی‌لگن.
بو قطع‌نامه تصویب ایتیلگن بیرحالده، افغانستان ده زوروانلیکلر میزانی کوپه‌یگن. قطر پایتختی دوحه ده افغانستانلیکلرارا سوزلشوولر باشلنگنیدن اوچ آی اوتیشی بیلن ایکی تامان هیأت‌لری تینچلیک پروسه‌سی نینگ طرزالعملی نی مقدمه‌سی اوستیگه کیلیشگن و بو سوزلشوولرنینگ آجنداسی اوستیگه صحبت اوتکزیلیشی گه قرار قیلینگن.
