بوگون (یکشنبه ۹- قوس) ایرته‌لب ساعت ۸ اطرافیده کماندولر جایلشگن غزنی شهری نینگ جوزه قلعه‌سیده، بمب جایلشتیریلگن بیر موتر پارتله‌گن. حربی شاهدلرنینگ ایتیش‌لریچه، بمب جایلشتیریلگن موتر کماندو قطعه‌سی نینگ مرکزی گه کیریب پارتله‌گن.
حادثه یوزبیرگن منطقه‌ده کیریش اوچون خبرچیلرگه رخصت بیریلمه‌گن، بیراق اوزاقدن بنا نینگ کوپ ییری تخریب بولگنی کورینه‌دی.
مذکور حادثه نینگ تلفاتی خصوصیده نظامی مسئوللر هیچ بیر رقم ترقتمه‌گن، بیراق ضربتی لوا اورین باسری عطاالله نینگ ایتیشیچه، خودکش هجومچی مقصدی گه یتیشمه‌گن.
غزنی ملکی کسلخانه باشلیغی باز محمد همت نینگ ایتیشیچه، حادثه محلیدن ۳۰ جسد و ۲۴ یره‌دار مذکور کسلخانه گه انتقال بیریلگن.
شونینگدیک زابل ولایتیده بمب جایلشتیریلگن موتر پارتلشی عاقبتیده ، ۲ کیشی هلاک و ۱۳ کیشی یره‌لنگن.
زابل امنیه قوماندانی حکمت کوچی نینگ سلام‌وطندارگه ایتیشیچه، بوگون (یکشنبه، ۹- قوس) توشدن آلدین ساعت ۱۰ اطرافیده بیر خودکش هجومچی بمب جایلشتیریلگن بیر موترنی مذکور ولایت مرکزی قلات شهریده، ولایتی کینگش باشلیغی عطاءجان حق‌بیان نینگ موتریگه توقنشتیرگن.
جناب کوچی نینگ کوپه‌یتیریشیچه، اوشبو واقعه ده جناب حق بیان بیر قوروقچیسی بیلن یره‌لنگن. بیراق باشقه بیر امنیتی منبع کیم‌لیگی سیر قالیش‌نی ایسته‌ب سلام‌وطندارگه ایتیشیچه، اوشبو واقعه‌ده جناب حق‌بیان نینگ بیر قوروقچیسی و باشقه بیر تینچ‌اهالی جان بیرگن.
انه‌شوحالده، زابل مرکزی کسل‌خانه‌سیدن بیر منبع کیم‌لیگی سیر قالیش‌نی ایسته‌ب سلام‌وطندارگه ایتیشیچه، حاضرگچه عیاللر و باله‌لر شامل ۱۱ یره‌دار کسلخانه گه انتقال بیریلگن.
ایتیش کیره‌ک کیم مذکور حادثه‌لر مسئولیتی نی حاضرگچه طالبان گروهی شامل هیچ بیر گروه بوینیگه آلمه‌گن.
