د پکتيا د اوبو او انرژي رياست له لوري نن سهشنبه، غويي ۲۲مه، د ګردېز ښار اړوند دوه کلیو کې د دوو رغنيزو پروژو چارې پيل شوې.
د پکتيا د اوبو او انرژي رياست سلاکار فضل الرحیم رحيمي د يادو پروژو د چارو پيل مراسمو کې وويل په دغو پروژو کې لومړنۍ یې د مرکز ګردېز اړوند نورالدین بابا کلي کې ګبیني دیوال ده چې ۴۶۴ متره اوږدوالی او ۴ څلور متره سور لري.
همداشان دویمه پروژه هم په ياده سيمه کې د ۲۷۶ مترو په اوږدالي استنادي دیوال دی چې په جوړیدو سره به یې زرګونه کورنۍ او کرنیزي ځمکې د سیلابي اوبو له خطرونو خوندي شي.
هغه وويل يادې دوه پروژې د اوبو او انرژي رياست لخوا په حکومتي بوديجه جوړيږي.
د سیمې اوسېدونکي هم د یادو پروژو چارو پيل باندې خوښي څرګندوي او وايي چې پخوا به يې سیلاب راوتو پرمهال ډېری کرنيزې ځمکې او کورونه زيانمنيدل، خو د دې دوه پروژو په پليکیدو سره به یې ځمکې او کورونه د سیلاب اوبو خطر څخه خوندي شي.
د نورالدين بابا کلي يوه اوسيدونکي تاج محمد وويل چې ډیری نور کليو کې هم د خوړونو په غاړو ډيری کورونه او ځمکې شته چې سيلابونو راوتو پر مهال زيانمنيږي.
هغه غوښتنه وکړه چې په يادو سيمو کې دې هم ورته پروژې پلې شي.