د لوګر برښنا شرکت چارواکي وايي چې د یاد ولایت مرکز پلعلم اړوند شپږو کلیو ته د برښنا رسونې نوې پروژه په رسمي توګه پیل شوه چې له بشپړېدو سره به یې شاوخوا ۲۶۰۰ کورنۍ له وارداتي او دوامدارې برښنا څخه برخمنې شي.
د دغه ولایت د برښنا ریاست رییس میراحمد ولي هاشمي د یادې پروژې د پیل مراسمو ته وویل چې پر دې پروژه څه باندې ۳۵ میلیونه افغانۍ لګښت راځي او په ترڅ کې به لس نوې ټرانسفرمرونه ولګول شي.
د نوموړي په وینا، د پروژې عملي چارې به د راتلونکو شپږو میاشتو په موده کې بشپړې شي.
هاشمي زیاته کړه چې د پروژې ټول مالي لګښت د افغانستان برښنا شرکت پر غاړه دی او له بشپړېدو وروسته به د راخوشي، ملایانو، کمالخېلو، جمالخېلو، عیاض ستي کوټ او د باري دښتې اوسېدونکي له وارېداتې برېښنا څخه برخمن شي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د لوګر مرستیال والي مولوي محمدانور دینپرور، د پروژې پیل د یادو سیمو لپاره یو مهم پرمختګ وباله او له خلکو یې وغوښتل چې د برښنا له بېځایه مصرف څخه ډډه وکړي او د اسلامي امارت له روانو رغنیزو پروګرامونو سره خپله همکاري لا پیاوړې کړي.
د سیمې اوسېدونکو د پروژې له پیل هرکلی وکړ او دا یې د کلونو انتظار وروسته یو ستر پرمختګ وباله. هغوی مسؤلینو ته ډاډ ورکړ چې د پروژې په عملي چارو کې به هر ډول لازم همکاری وکړي.
د یادونې وړ ده، چې په دې پروژه کې د یادو شپږو کلیو د برېښنا شبکې د ایجاد ترڅنګ د ټرانسفرمرونو، مزیو او اړینو تخنیکي تاسیساتو لګول هم شامل دي.
