د افغانستان او پاکستان د پلاویو ترمنځ د خبرو دویم پړاو د ترکیې په استانبول ښار کې پای ته رسېدلی او دواړو لورو پر اوربند او د راتلونکي پړاو د ناستې پر جوړېدو هوکړه کړې ده.
د اسلامي امارت ویاند، ذبیحالله مجاهد، د درېیم پړاو ناستې د ګټورې پایلې په اړه هیلهمندي څرګنده کړه چې په وینا یې، د پاتې موضوعاتو په تړاو به راتلونکې ناسته کې خبرې پرې وشي.
هغه وویل: «موږ له ټولو هېوادونو، په شمول له پاکستان سره ښې اړیکې غواړو؛ د شخړو دوام دواړو هېوادونو ته زیان رسوي. تفاهم یوازینۍ لار ده چې دواړه خواوې ګټورې پایلې ته رسولی شي. اسلامي امارت او د افغانستان خلک له هېوادونو سره ښې اړیکې او په سیمه کې امنیت او ثبات غواړي، تر هغه حده چې توان او مسئولیت یې ولري.»
که څه هم پلان شوې وه چې د افغانستان او پاکستان خبرې به دوه ورځې دوام وکړي، خو دا ناسته له څلورو ورځو څخه زیاته اوږده شوه.
د قطر لپاره د اسلامي امارت سرپرست سفیر او د اسلامي امارت د پلاوي غړی، سهیل شاهین بيبيسي سره په تازه مرکه کې د خبرو د اوږدېدو اصلي لامل د پاکستان غیرعملي غوښتنې وبللې.
هغه وویل: «مقابل لوری داسې غوښتنې لري چې غیرعملي دي او پرې ټینګار کوي. موږ هم خپلې منطقي غوښتنې وړاندې کړې، خو پر دې توافق ته ونه رسېدو. یوه غیرمنطقي غوښتنه دا وه چې په پاکستان کې دې د امنیت ضد پېښې ونه شي؛ دا د هغوی خپل هېواد دی او مسئولیت یې هم د دوی پر غاړه دی. افغانستان څنګه کولای شي د بل هېواد مسئولیت په غاړه واخلي؟»
شاهین همدارنګه وویل چې د افغانستان له لوري په دویم پړاو خبرو کې پر دې ټینګار شوی و چې د هوایي حریم سرغړونه ونه شي، پاکستان له داعش او نورو ډلو څخه د افغانستان پر وړاندې ملاتړ ودروي او سیاست د اقتصاد څخه جلا وساتل شي؛ خو تراوسه په دې موضوعاتو توافق نه دی شوی.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
سیاسي شنونکي باور لري چې د دواړو هېوادونو توافق پر دې چې درېیم پړاو وشي او د خبرو لارې پرانستې پاتې شي، د دواړو خواوو د خبرو او ډیپلوماتیکو لارو د حل غوښتنه څرګندوي.
نجیبالرحمن شمال او اکرم عارفي وایي چې د درېیم پړاو د ناستو د بریا لپاره، پاکستان باید خپلې غیرمنطقي غوښتنې د افغانستان پر وړاندې لهمنځه یوسي.
دوی وویل: «د افغانستان او پاکستان مسایل ساده نه دي؛ پاکستان پر دې ټولو بهانې جوړولو پر ځای باید خپل داخلي ستونزو ته پام وکړي. تر هغه چې د خپل هېواد ستونزې حل نه کړي، افغانستان هیڅ تضمین نه شي ورکولی. پاکستان باید په افغانستان کې خپله دښمنانه سیاست پرېږدي، ځکه چې په دې ډول به هېڅ نتیجه ته ونه رسیږي.»
عارفي وویل: «که پاکستان و نه شي کولای له افغانستان سره ښې اړیکې وساتي، نور هېوادونه شته چې وضعیت د پاکستان په زیان بدل کړي. بهرني فشارونه هم اغېزناک وو او دواړه هڅه کوله چې د دې ناستو څخه مثبت نتیجه ترلاسه کړي، ځکه د خبرو ناکامي د منځګړیتوب د رول ناکامي هم ګڼل کېده.»
په همدې حال کې، د پاکستان بهرنیو چارو وزارت هم هیله څرګنده کړې چې راتلونکی پړاو به ګټوره پایله ولري.
د دې وزارت ویاند، طاهر اندرابي، وویل: «پاکستان د شخړو د زیاتوالي په لټه کې نه دی، خو تمه لري چې امارت اسلامي خپلې ژمنې عملي کړي او د دې هېواد امنیتي اندېښنې لرې کړي.»
خو ذبیحالله مجاهد ټینګار کوي چې افغانستان، تر هغه حده چې مسئولیت لري، په سیمه کې د ثبات او امنیت د ټینګښت لپاره ژمن او همکار دی.
