د فلسطین د اشغال شوې لوېدیځې غاړې نابلس ښار کې د اسراییلي ځواکونو په برید کې دوه فلسطینیان وژل شوي او درې نور ټپیان دي.
د فلسطین د سرې میاشتې ټولنې نن جمعه د جولای اوومه په یوې خبرپاڼه کې ویلي چې د دوی امبولانسونو له «زاړه نابلس» ښار څخه دوه جسدونه لېږدولي دي.
د سلاموطندار پښتو فېسبوکپاڼه وڅارئ
الجزیرې خبري شبکې د فلسطین وفا خبري اژانس له قوله راپور ورکړی چې برید کې د حمزه مقبول او خیري شاهین په نوم دوه فلسطینیان وژل شوي دي.
بلخوا اسراییلي ځواکونو ویلي، پر دې دوو کسانو یې روانه اوونۍ کې د پوځ پر ضد د وسلې کارولو شک درلود. برید کې درې نور فلسطینیان ټپیان شوي دي.
د اسراییلي له لوري دغه فلسطینیان داسې مهال وژل کېږي چې دوه ورځې وړاندې هم د جنین د کډوالو پر کمپ د اسراییلي په برید کې ۱۲ فلسطینیان وژل شوي وو.
د راپورونو له مخې، دې برید کې له ۱۴۰ ډېر کسان ټپیان شوي هم وو چې د ۳۰ کسانو روغتیايي وضعیت د اندېښنې وړ ښودل شوی و.
د جنین کډوالو پر کمپ د اسراییلي ځواکونو برید په ۲۰ کلونو کې کمساری بللی شوی چې له امله یې زرګونه کسان له کمپ څخه وتلو ته اړ شوي دي.