د بهرنیو چارو وزارت مسوولان وايي چې د یاد وزارت سرپرست امیرخان متقي د پاکستان د بهرنیو چارو وزیر بلاول بوټو زرداري سره ټيلیفوني خبرې کړي او دغه هېواد کې د افغان بندیانو د خوشېکېدو غوښتنه یې کړې ده.
د بهرنیو چارو وزارت د ویاند مرستیال ضیااحمد تکل وايي، د پاکستان د بهرنیو چارو وزیر ډاډ ورکړی چې دغه هېواد کې ټول افغان بندیان به له کوچني اختر مخکې خوشې شي.
نوموړي ویلي: «د نیکمرغه کوچني اختر تر رارسېدو مخکې په پاکستاني بندیخانو کي پاته افغاني بندیان هم ازاد او خپلو کورونو ته را ستانه شي، په مقابل کي یې ښاغلي بوټو د بندیانو د خلاصون ډاډ ور کړ. همدارنګه دواړو لوریو موافقه وکړه چي دیپلوماتیکو اړیکو ته به وده ورکوي.»
د بهرنیو چارو وزارت مسوولانو همداراز ویلي چې واک ته د اسلامي امارت له رسېدو وروسته تر دا مهاله ۲۰۰۰ افغان بندیان د پاکستان له بندخونو خوشې شوي چې دا لړۍ لا هم روانه ده.
همداراز پاکستان کې یوشمېر افغان کډوال وايي چې دې ورځو کې دغه هېواد کې د افغان کډوالو نیول زیات شوي دي.
پاکستان کې افغان کډوال احمدفهیم انصاري وویل: «دې ورځو کې د پاکستان وضعیت سم نه دی او افغان کډوال چې دې هېواد کې په ناقانونه توګه ژوندي کوي، نیول کېږي او افغانستان ته لېږل کېږي.»
سلاموطندار پر ټویټر هم وڅارئ
د کډوالو او بېرته راستنېدونکو چارو وزارت د معلوماتو پر بنسټ، دا مهال څه باندې درې میلیونه افغان کډوال پاکستان کې ژوند کوي چې ډېری یې له فزیکي تاوتریخوالي او رواني ځورونې سره مخ دي.