د افغانستان لپاره د سیمې د تماس ډلې دویمه غونډه د شنبې په ورځ د افغانستان په چارو کې د ایران، روسیې، چین او پاکستان د ځانګړو استازیو په ګډون د ایران په پلازمېنه تهران کې جوړه شوه.
د سلاموطندار پښتو فېسبوکپاڼه وڅارئ
د ایران د بهرنیو چارو د وزارت سرپرست او د دغه وزارت د سوېلي اسیا د چارو عمومي رییس سیدرسول موسوي په دې غونډه کې ویلي، دا غونډه د سیمهییزو همکاریو او ادغام په رڼا کې د افغانستان د سولې، ثبات او پرمختګ لپاره یو پیغام دی.
هغه د ایران د بهرنیو چارو د سرپرست وزیر علي باقري له قوله یو ځل بیا په افغانستان کې د یوه ټولشموله حکومت د جوړېدو غوښتنه هم کړې ده.
په همدې حال کې د ا.ا د بهرنیو چارو وزارت د درېیم سیاسي ریاست رییس ذاکر جلالي د شنبې په ورځ پر خپل اېکس لیکلي چې ا.ا سره له دې چې د افغانستان لپاره د سیمې د تماس ډلې غونډه کې د ګډون بلنه ورکړل شوې، خو ګډون پهکې نه کوي. د هغه په وینا، د افغانستان په اړه غونډې باید د منل شویو مېکانیزمونو پر بنسټ جوړې شي.
د نړیوالو اړیکو کارپوه بلال فاطمي وايي، د ا.ا د استازي له ګډون پرته د دا ډول غونډو جوړېدل به کومه پایله ونه لري.
نوموړی زیاتوي: «د سیمې د تماس ډلې غونډه د افغانستان اړوند ده او له افغانستان سره په ګډه یې باید جوړه کړي؛ د افغانستان موضوعات مهم دي او باید کار پرې وشي. دا چې د تماس ډله ایران جوړه کړه، خو د افغانستان استازی پهکې نشته، بېپایلې ده.»
د يادونې ده چې تېر کال د افغانستان لپاره د سیمې د تماس ډلې لومړۍ غونډه په کابل کې جوړه شوې وه او د سيمې او ګاونډيو هېوادونو ځانګړو استازیو پهکې برخه اخيستې وه.