د پنجشېر محلي مسوولان وايي، ټاکل شوې د دغه ولایت د اوسپنې کان د اېستلو چارې د ۷۰ میلیونه ډالرو په ارزښت پیل شي. د مسوولانو په وینا، د یاد کان د اېستلو او تولید لومړني کارونه له یوه کورني شرکت سره پیل او پای ته رسېدلي دي.
د سلاموطندار پښتو فېسبوکپاڼه وڅارئ
د پنجشېر د والي ویاند سیفالدین لټون سلاموطندار ته ویلي چې د «ابارسین کچکن» په نوم د کانونو د اېستلو شرکت د دغه ولایت د اوسپنې کان داوطلبي ګټلې ده.
هغه زیاتوي چې د دغه ولایت والي محمداغا حکیم د یاد شرکت له مسوولانو غوښتي چې د پنجشېر ځوانان په خپله پروژه کې وګوماري.
نوموړي دغه راز ټینګار کړی چې د اېستل شوې اوسپنۍ د تولید، پراسېس او ویلې کېدو بهیر باید په دغه ولایت کې وشي.
دا پروژه به د پنجشېر په پریان ولسوالي کې د ۷۰ میلیونه ډالرو په ارزښت پلې او ۲۰۰۰ کسانو ته به کار پهکې پیدا شي چې په دې سره به په دغه ولایت کې د وزګارتیا کچه را ټیټه شي.
