د روسیې د دفاع وزارت نن سهشنبه، اګسټ۱۹، اعلان وکړ چې د دغه هېوادTu-95MS اټومي وړتیا لرونکې ستراتیژیک بمبغورځونکې الوتکې د یوې منظمې او له وړاندې طرحه شوې الوتنې له مخې، د جاپان سمندر د بېطرفه اوبو پر فضا الوتنې کړي دي.
د وزارت د معلوماتو له مخې، دې الوتنې تر شپږو ساعتونو زیاته الوتنه کړې ده.
سرچینې زیاتوي چې د بمبغورځونکو د خوندي تګراتګ لپاره، د روسیې د هوايي ځواک پرمختللي جنګي الوتکېSu-35S اوSu-30SM هم ورسره مل وې.
د دغو جنګي الوتکو ګډون نه یوازې د بمبغورځونکو الوتکو د امنیت تضمین دی، بلکې د روسیې د هوايي ځواک د چمتووالي او عملیاتو د همغږۍ څرګندونه هم کوي.
سلاموطندار پر اېکسپاڼه هم وڅارئ
د سلاموطندار پښتو فېسبوکپاڼه وڅارئ
د روسیې دفاع وزارت ټینګار کړی چې دا ډول الوتنې د نړیوالو قوانینو او نړیوال هوايي حریم د اصولو پر بنسټ کېږي او هېڅ هېواد ته ګواښ نه جوړوي.
دغه ډول پروازونه د روسیې د ستراتیژیکو اټومي ځواکونو د روزنیز پروګرام برخه ګڼل کېږي چې موخه یې د ځواکونو د دوامداره چمتووالي ساتل او د هوايي ځواک د غبرګون وړتیا ارزول دي.
د یادونې وړ ده چې Tu-95MS د روسیې د اوږده واټن بمبغورځونکو الوتکو څخه شمېرل کېږي چې د اټومي وسلو د انتقال وړتیا لري او کولای شي له څو زره کیلومتره واټن څخه د اهدافو د نښه کولو توان ولري.
دغه الوتکه لا تر اوسه د روسیې د ستراتیژیکې دفاع یوه مهمه برخه بلل کېږي.
