د راپورونو له مخې، د افغانستان لپاره د روسیې د ولسمشر ځانګړي استازي ضمیر کابلوف د سېشنبې په ورځ یوې خبري غونډې ته ویلي، مسکو د شانګهای همکاریو سازمان کې د افغانستان د غړیتوب ملاتړ کوي.
هغه ټینګار کړی چې د شانګهای همکاریو سازمان کې د افغانستان غړیتوب لپاره اړتیا ده چې د دغه هېواد په اقتصاد کې نسبي نظم راوستل شي.
د سلاموطندار پښتو فېسبوکپاڼه وڅارئ
کابلوف په دې اړه ویلي: «د افغانستان په اقتصاد کې باید یو نسبي نظم راشي، څو د شانګهای همکاریو نور غړي هېوادونه په دغه سازمان کې د افغانستان له غړیتوب سره هوکړه وکړي.»
په همدې حال کې د ا.ا د اقتصاد وزارت د شانګهای همکاریو سازمان ارزښت ته په اشارې په دغه سازمان کې د افغانستان غړیتوب مهم بولي.
د دغه وزارت ویاند عبدالرحمان حبیب وايي، د شانګهای همکاریو سازمان کې د افغانستان غړیتوب نه یوازې د هېواد، بلکې د دغه سازمان د نورو غړیو هېوادونو په ګټه هم تمامېږي.
هغه زیاتوي: «په دغه سازمان کې زموږ د هېواد غړیتوب له نورو غړیو هېوادونو سره د افغانستان د سوداګریزو او ټرانزېټي همکاریو د پراختیا لامل کېږي.»
د شانګهای همکاریو سازمان چې د چین او روسیې په ګډون، د سیمې له هېوادونو جوړ شوی، د اقتصادي او سیاسي همکاریو په برخه کې د سیمې په کچه یو مهم سازمان دی.
د اقتصادي چارو کارپوه عبدالنصیر رښتیا د شانګهای همکاریو سازمان اقتصادي ارزښت ته په اشارې وايي، که په دغه سازمان کې افغانستان ته غړیتوب ورکړل شي، اړتیا ده چې په ورته نورو سازمانونو کې هم د افغانستان حضور لپاره اسانتیاوې برابرې شي. هغه زیاتوي د دغه سازمان غړیتوب د افغانستان لپاره ګټور تمامېدای شي.»
د سلاموطندار پښتو فېسبوکپاڼه وڅارئ
د یادونې ده چې افغانستان اوس د شانګهای همکاریو سازمان ناظر غړی دی، خو په وروستیو څو کلونو کې د سیاسي ستونزو له کبله نهدی توانېدلی چې د دغه سازمان په غونډو کې ګډون وکړي.
