عراق کې سلګونه لاریون کوونکو سویډن کې د قرانکریم سوځولو په غبرګون کې د دغه هېواد په پلازمېنه بغداد کې د سویډن سفارت ته اور اچولی دی.
قهرجنو لاریون کوونکو نن پنجشنبه د جولای ۲۰مه بغداد کې د سویډن پر سفارت برید وکړ، دیوالونه یې ونړول او ځینو برخو ته اور ورته کړی دی.
د سلاموطندار پښتو فېسبوکپاڼه وڅارئ
رویټرز خبري اژانس د سویډن د بهرنیو چارو وزیر توبیاس بیلستروم له قوله راپور ورکړی چې د سفارت کارکوونکي خوندي دي، خو عراقي چارواکي یې د سفارت خوندي ساتلو کې پاتې بللې دي.
د سویډن د بهرنیو چارو وزیر په یوه بیان کې ویلي: «هغه څه چې پېښ شوي، په بشپړه توګه د منلو وړ نه دي او حکومت دا بریدونه په کلکو ټکو غندي. حکومت د عراق لوړپوړو چارواکو سره په اړیکه کې دی.»
د رویټرز خبري اژانس د راپور پر بنسټ دغه لاریون عراق کې شیعه مذهبي مشر مقتدي الصدر په غوښتنه د نوموړي د پلویانو له لوري سویډن کې د قرانکریم د سوځولو په غبرګون کې رابلل شوی و.
بلخوا د فنلنډ خبري اژانس «STT» خبر ورکړی چې د سویډن سفارت ګاونډ کې د فنلنډ سفارت کارکوونکي هم له دغه سفارت اېستل شوي او کوم زیان ورته نه دی اوښتی.
