د روغتیا نړیوال سازمان ویلي چې سوډان کې د واک پر سر د دغه هېواد د پوځ او نیمه ملیشه ډلې «RSF» ترمنځ د نښتو په پایله کې تراوسه ۴۱۳ کسان وژل شوي او څه باندې ۳۵۵۰ کسان ټپیان شوي دي.
روغتیا نړیوال سازمان په وژل شویو او ټپیانو کې د ملکیانو د کره شمېرې په اړه جزیات نه دي ورکړي، خو د سوډان د ډاکټرانو ټولنې ویلي، د روانې جګړې له امله تراوسه ۲۵۰ ملکیان وژل شوي او ۱۴۵۰ ملکي وګړي ټپیان دي.
په سوډان کې روغتیايي چارواکو هم ویلي چې د یاد هېواد روغتیايي مرکزونه د وینې، درملو او نورو طبي توکو له کمښت سره مخ شوي دي.
د دوی په وینا، ډېری روغتونونو ته د جګړې له امله زیان رسېدلی او یوشمېر یې د امنیتي ګواښونو، د درملو او نورو توکو د نه ورسېدو او وېرې له کبله تړل شوي دي.
د سوډان د پوځ مشر جنرال عبدالفتاح البرهان له یوشمېر هېوادونو سره له دغه هېواده د خپلو ډيپلوماټانو او اتباعو د خوندي اېستلو غوښتنه کړې. له یادې غوښتنې وروسته امریکا نن د اپرېل ۲۳مه له سوډانه د خپل سفارت ډيپلوماټان تخلیه کړل.
سلاموطندار پر ټویټر هم وڅارئ
فرانسې، هالند او یوشمېر نورو هېوادونو هم له سوډان څخه د خپلو ډيپلوماټانو او اتباع د تخلیې لپاره چمتووالی نیولی دی.
