د کډوالو او بېرته راستنېدونکو چارو وزارت مسوولانو په یوه خبرپاڼه کې ویلي چې ایران په تېره یوه ورځ کې د هرات اسلامکلا له لارې ۱۷۷۳ افغانان په زوره هېواد ته را ګرځولي دي.
په خبرپاڼه کې لیکل شوي چې پاکستان هم په تېره یوه ورځ کې ۳۲۴ افغانان د کندهار د سپینبولدک له لارې هېواد ته په زوره راګرځولي دي.
په ورته وخت کې له ایران او پاکستان څخه را اېستل شوي افغانان له سرپرست حکومته غواړي چې د اوسېدو ځای او کاري بوختیاوو ورته برابرې کړي.
عبید چې د هرات اوسېدونکی دی او تېره ورځ د اسلامکلا له لارې په زوره هېواد ته راګرځول شوی، وايي: «له حکومته غواړو چې هېواد کې د کار اسانتیاوې برابرې کړي؛ تر څو به ایران، پاکستان او ترکیه ته روان یوو.»
د ننګرهار اوسېدونکی سمېعالله هم چې تازه له پاکستان څخه را اېستل شوی، له سرپرست حکومت څخه غواړي چې د اوسېدو لپاره یې تلپاتې ځای او د کار اسانتیاوې برابرې کړي.
د یادونې ده چې د ملګرو ملتونو د کډوالۍ نړیوال سازمان تر دې وړاندې ویلي و چې د روان زېږدیز کال په تېرو څه باندې څلورو میاشتو کې له ایران او پاکستان څخه شاوخوا نیم میلیون افغانان په زوره او خپله خوښه هېواد ته را ګرځول شوي دي.
