د سوېلي کوریا یوه بندر ته د بالېسټیک وسلو لرونکي امریکايي اوبتل له رسېدو سره هممهاله شمالي کوریا نن چهارشنبه د جولای ۱۹مه دوه بالېسټیک توغندي توغولې دي.
په تېرو ۴۰ کلونو کې دا لومړی ځل دی چې پر بالېسټیکو توغندیو سمبال د امریکا یو اوبتل د سوېلي کوریا یوه بندر ته نږدې کېږي.
د سلاموطندار پښتو فېسبوکپاڼه وڅارئ
د جاپان دفاع وزارت چارواکو ویلي چې د دغه توغنديو له توغولو وروسته د جاپان اقتصادي زون بهر په سمندر کې رالوېدلې دي.
بلخوا د سوېلي کوریا د ګډو ځواکونو لوی درستیز پر شمالي کوریا غږ کړی چې د بالسټیک توغندیو له ازموینې دې ډډه وکړي.
د سوېلي کوریا د ګډو ځواکونو په خبرپاڼه کې ویل شوي: «موږ د شمالي کوریا پرلهپسې د بالستیک توغندیو ازمایښت د جدي پارونکو عملونو په توګه په کلکه غندو چې د کوریا ټاپووزمې سوله او ثبات او همدارنګه نړیوالې ټولنې ته زیان رسوي او د ملګرو ملتونو د امنیت شورا له پرېکړهلیکونو څخه ښکاره سرغړونه ده.»
دا ازمایښتونه نږدې یوه اوونۍ وروسته له هغې کېږي چې شمالي کوریا خپل وروستي هاوسنګ – ۱۸ بالیسټیک توغندي ازموینه وکړه چې پیونګ یانګ وویل، دغه ازموینه د امریکا او د دوی نورو مخالفانو لپاره یو خبرداری دی.
