د ننګرهار ځايي چارواکي وايي، د پاکستان کونسلګرۍ کې ویزو پسې ورغلې ۱۱ مېرمنې د ډېرې ګڼېګوڼې له کبله مړې شوي او ۱۲ کسان ټپيان شوي دي.
د ننګرهار د ملکي روغتون ویاند ګلزاده سنګر وايي، دغه شمېر مړي او ټپيان د چهارشنبې په سهار جلالاباد حوزوي روغتون ته وړل شوي دي.
دولسو ټپيانو کې هم یوازې درې نارینه او پاتې نهه مېرمنې دي چې د ځینو وضعیت ښه نه دی.
ننګرهار کې یوې امنیتي سرچینې هم دا خبر تایید کړی دی.
له اوږد قرنتین وروسته ننګرهار کې د پاکستان کونسلګرۍ د ویزو ورکړه پیل کړې.
ولسي وګړي وايي، د ویزې اخيستونکيو ډېروالي او د کونسلګرۍ او د ننګرهار چارواکيو د ناسم مدیریت له کبله ویزه اخيستو کې رشوت او واسطې اوج ته رسېدلي چې بیا دا ډول پېښې رامنځته کېږي.
