د ا.ا ویاند ذبېحالله مجاهد په پنجشېر کې د چاڼیزو عملیاتو خبر ورکوي. نوموړي پر خپل ټویټر لیکلي چې د دغه ولایت په رخه، دره او افشار ولسواليو کې یې چاڼیز عملیات کړي دي.
د هغه په خبره، یادو عملیاتو کې یې د فهیم کومانډو، جواد، ملک خان او محمدیار په نومونو د څلورو قوماندانانو په ګډون، ۴۰ کسان وژلي او ۱۰۱ نور یې ژوندي نیولي دي. مجاهد زیاتوي چې یادو کسانو غوښتل د «خلکو امنیت» ګډوډ کړي.
که څه هم نوموړي د کومې وسلهوالې ډلې نوم نه دی اخیستی، خو په یاد ولایت کې د مقاومت جبهې وسلهوال فعالیت کوي او وختناوخت ترې د وسلهوالو نښتو راپورونه هم ورکول کېږي.
ا.ا په دې جګړه کې خپل لوري ته د اوښتې مرګژوبله په اړه څه نه دي ویلي.
خو د مقاومت ډلې ویاند صبغتالله احمدي پر ټویټر لیکلي چې د پنجشېر جګړه کې یې د اسلامي امارت ۷۱ غړي وژلي دي.
نوموړي د دواړو لوریو نښتو کې د خپلو ۱۱ کسانو د وژل کېدو پخلی هم کړی دی.
